Ceisio llofruddio mewn ysgol: Cadw bachgen yn y ddalfa
- Cyhoeddwyd
Fe ddigwyddodd yr ymosodiad honedig yn Ysgol Uwchradd Eirias ym Mae Colwyn
Mae bachgen 15 oed wedi cael ei gadw yn y ddalfa ar ôl cael ei gyhuddo o geisio llofruddio disgybl mewn ysgol uwchradd yn Sir Conwy.
Bu'n rhaid i'r disgybl gael triniaeth ysbyty ar ôl y digwyddiad yn Ysgol Uwchradd Eirias ym Mae Colwyn ddydd Llun.
Fe wnaeth y bachgen ymddangos yn Llys Ieuenctid Llandudno ddydd Mercher wedi'i gyhuddo o un cyhuddiad o geisio llofruddio a thri chyhuddiad o fod â chyllell mewn man cyhoeddus.
Bydd yn cael ei gadw mewn canolfan i droseddwyr ifanc nes ei ymddangosiad nesaf yn Llys y Goron yr Wyddgrug ar 13 Mawrth.
Does dim modd cyhoeddi enw'r bachgen oherwydd ei oed.