Aron Gunnarsson yn debygol o adael Caerdydd
- Cyhoeddwyd
Fe wnaeth Aron Gunnarsson arwyddo i Gaerdydd yn haf 2011
Mae chwaraewr canol cae Caerdydd, Aron Gunnarsson yn debygol o adael y clwb pan fydd ei gytundeb yn dod i ben ar ddiwedd y tymor.
Fe wnaeth y chwaraewr 29 oed arwyddo cytundeb am flwyddyn yn unig wedi i'r clwb ennill dyrchafiad i Uwch Gynghrair Lloegr, ond mae adroddiadau wedi'i gysylltu â chlwb Al-Arabi yn Qatar.
Byddai capten Gwlad yr Iâ yn ymuno â'i gyn-reolwr ar lefel ryngwladol, Heimir Hallgrímsson, sydd wedi bod yn rheolwr Al-Arabi ers y llynedd.
Mae Gunnarsson wedi chwarae 278 gwaith dros Gaerdydd, ac o'r garfan bresennol ef sydd wedi bod â'r clwb am y cyfnod hiraf.