Arglwydd Hain heb dorri rheolau safonau Tŷ'r Arglwyddi

Fe wnaeth Arglwydd Hain ddefnyddio braint seneddol er mwyn enwi Syr Philip

Mae Comisiynydd Safonau Tŷ'r Arglwyddi wedi gwrthod cwyn fod Arglwydd Hain wedi methu a datgan diddordeb wrth iddo gyhoeddi yn y senedd fod y miliwnydd Syr Philip Green yn gysylltiedig gyda honiadau o ymddygiad amhriodol.

Fis Hydref y llynedd fe wnaeth Mr Hain, cyn Ysgrifennydd Cymru a Gogledd Iwerddon, enwi Sir Philip fel y dyn busnes amlwg nad oedd y Daily Telegraph yn cael cyhoeddi ei enw oherwydd gorchymyn llys.

Yn dilyn hynny fe wnaeth cyfreithwyr Syr Philip, Schillings, gwyno fod Arglwydd Hain wedi methu a datgelu ei fod ef yn ymgynghorydd i gwmni cyfreithwyr Ince Gordon Dadds, oedd yn cynrychioli grŵp papurau newydd y Telegraph.

Fe wnaeth Schillings hefyd gwyno y dylid ystyried datganiad Arglwydd Hain fel un oedd yn cynnig gwasanaeth seneddol am dâl, a bod y defnydd o hawliau seneddol yn yr achos hwn wedi torri rheolau sub judice.

'Afresymol i geryddu'

Mewn adroddiad ddydd Llun, dywedodd y comisiynydd Safonau, Lucy Scott-Moncrieff, ei bod yn gwrthod yr honiad o dderbyn tâl am wasanaethau seneddol, a dywedodd nad oedd materion ynglŷn ag hawliau seneddol a sub judice yn dod o dan ei goruchwyliaeth.

Fe wnaeth hi hefyd wrthod yr honiad o fethu a chyhoeddi diddordeb ar ôl iddi dderbyn tystiolaeth gan Arglwydd Hain nad oedd ef yn ymwybodol o rôl Ince Gordon Dadds yn achos Syr Philip Green.

"Byddai'n afresymol i'w geryddu am fethu a datgan diddordeb am yr hyn nad oedd yn ymwybodol ohono," meddai.