Ffilm newydd am 'addysgu pobl am gyflwr awtistiaeth'

Mae hyder Charlie wedi cynyddu yn aruthrol ers y ffilmio, yn ôl yr actor ifanc

Mae hogyn ifanc sydd yn byw gyda chyflwr awtistiaeth wedi cael ei ddewis i serennu mewn ffilm western newydd.

Daeth Charlie Lock, o Fynwent y Crynwyr yn y cymoedd, i wybod fod ganddo'r cyflwr pan yn bedair oed, nawr yn 11 mae Charlie yn cael cyfle i wireddu breuddwyd.

Mae'r ffilm, 'Showdown', yn adrodd hanes hogyn ifanc awtistig sydd â diddordeb mawr mewn ffilmiau western ond sydd â pherthynas anodd gyda'i dad.

Dywedodd cyfarwyddwyr y ffilm, Kristian Kane a Lewis Carter, bod cael actor sydd yn byw gyda'r cyflwr i chwarae'r rhan yn hanfodol.

Yn ôl Charlie, nid oes yno ffordd well i ddysgu pobl am awtistiaeth na drwy actio.

• Y profiad o fagu plentyn ag awtistiaeth

• Wynebu'r dyfodol gydag awtistiaeth

Mae awtistiaeth yn anhwylder sbectrwm, a olygai ei fod yn effeithio pobl mewn gwahanol ffyrdd.

Dywedodd Charlie ei fod wedi methu a pherfformio mewn perfformiadau yn yr ysgol gan fod "nifer y bobl a'r goleuadau yn ormod" iddo.

Ond ar ôl i'w fam ymateb i hysbyseb yn gofyn am actorion ifanc gyda gwallt cyrliog, fe ddisgynnodd Charlie mewn cariad â'r grefft.

"Dwi'n gwybod yn union be sy'n digwydd, dyna yw'r peth gorau," meddai.

Nid yw cymeriad Charlie, Sam, yn siarad yn y ffilm

"Rydw i eisiau pobl i ddeall mwy am blant sydd ag awtistiaeth ac i beidio meddwl y gwaethaf bob tro."

"'Dwi'n deall yn union sut beth yw byw gydag awtistiaeth, a gan nad yw pawb yn deall sut beth ydi hynny, mae'n rhaid i mi ddangos iddyn nhw."

Ychwanegodd: "Rydw i eisiau dangos i blant awtistig bod modd iddyn nhw lwyddo fel fi a 'dwi eisiau gweld nhw'n dilyn cyflawni pethau arbennig."

Bydd 'Showdown' yn cael ei ddangos am y tro cyntaf yn Abertawe ar 24 Mai.