Mark Williams yn yr ysbyty gyda phoenau yn ei frest

Mae pencampwr snwcer y byd, Mark Williams yn dweud ei fod wedi mynd i'r ysbyty gyda phoenau yn ei frest yng nghanol ei gêm yn ail rownd Pencampwriaeth y Byd yn Sheffield.

Dywedodd y Cymro 44 oed ei fod wedi mynd i'r ysbyty ar ôl sesiwn agoriadol ei gêm yn erbyn David Gilbert, gyda Gilbert ar y blaen o 5-3.

Fe wnaeth Williams drydar yn dweud nad oedd yn gallu delio â'r boen a'i fod felly wedi mynd i uned frys.

"Yn ffodus, doedd 'na ddim mwy o fframiau i'w chwarae," meddai.

Mae'r gêm i fod i ailddechrau am 10:00 fore Sadwrn.