Carcharu dyn am 18 mis am ddwyn gwn Taser

Mae dyn wnaeth ddwyn gwn Taser oddi wrth blismon wedi cael ei garcharu am 18 mis.

Roedd Barry John Roberts, 37 oed, wedi pleidio'n euog mewn gwrandawiad blaenorol i ddwyn ac o fod ag arf gwaharddedig yn ei feddiant.

Clywodd Llys y Goron Caernarfon nad yw'r gwn Taser wedi dod i'r fei ers y digwyddiad.

Wrth ddedfrydu Roberts, dywedodd y Barnwr Huw Rees: "Mae'r potensial i gamddefnyddio'r arf yma yn fater o bryder mawr."

Digwyddodd y lladrad wedi i heddwas - oedd ddim yn gwisgo lifrau - geisio archwilio dyn arall ar Stryd Fawr Bangor ar amheuaeth o gamddefnyddio cyffuriau.

Dechreuodd sgarmes wrth i dorf ymgynnull.

Mae lluniau CCTV yn dangos y diffynnydd yn codi'r gwn Taser a cherdded i ffwrdd.

Dywedodd bargyfreithiwr Roberts wrth y llys nad oedd ei gleient "yn meddwl ar y pryd" a'i fod dan ddylanwad meddyginiaeth.

Honnodd iddo guddio'r gwn Taser y tu ôl i dafarn yn y ddinas.

Cafodd gwain a chetris y gwn Taser eu darganfod yn ddiweddarach mewn eiddo yng Nghaernarfon lle'r oedd y diffynnydd yn aros o bryd i'w gilydd.