Eisteddfod Sir Conwy: Diwrnod seremoni Gwobr Daniel Owen

Mari Williams o Gaerdydd enillodd y wobr yn Eisteddfod Caerdydd y llynedd

Seremoni Gwobr Goffa Daniel Owen fydd prif ddefod llwyfan y pafiliwn yn Eisteddfod Genedlaethol Sir Conwy ddydd Mawrth.

Mae'r wobr yn cael ei rhoi am nofel heb ei chyhoeddi gyda llinyn storïol cryf heb fod yn llai na 50,000 o eiriau.

Os fydd teilyngdod, bydd y nofelydd buddugol yn ennill medal a £5,000.

Haf Llewelyn, Dyfed Edwards a Llwyd Owen yw beirniaid y gystadleuaeth eleni, sydd wedi denu wyth o ymgeision.

• Mwy o newyddion a straeon o'r Eisteddfod Genedlaethol

Ross a Susan Morgan, Llanrwst yw noddwyr y fedal eleni.

Os fydd teilyngdod, bydd y nofelydd buddugol yn ennill medal a £5,000

Mae £3,500 o'r wobr ariannol yn rhodd er cof am Olwen Mai Williams o Gwm Penmachno gan ei theulu.

Mae Gwasg Carreg Gwalch hefyd wedi cyfrannu £1,000 ac mae Ymddiriedolaeth D Tecwyn Lloyd wedi cyfrannu £500.

Mari Williams o Gaerdydd ddaeth i'r brif yn y gystadleuaeth y llynedd gyda'r nofel 'Ysbryd yr Oes'.

Sioe gerdd Te yn y Grug - addasiad Cefin Roberts, Karen Owen ac Al Lewis o gyfrol enwog Kate Roberts a gafodd ei chyhoeddi union 60 mlynedd yn ôl - fydd yn y pafiliwn nos Fawrth.