Bag o folltiau trac oedd 'tirlithriad' ar reilffordd

Roedd yna amheuaeth bod cerrig mawr wedi syrthio yn nhwnnel Blaenau Ffestiniog gan atal trenau rhag pasio

Mae Network Rail wedi cadarnhau mai offer cynnal a chadw, ac nid cerrig mawr o ganlyniad tirlithriad, oedd ar ran o reilffordd Dyffryn Conwy lle bu'n rhaid gohirio gwasanaethau trên dros dro.

Cyhoeddodd y cwmni nos Fercher bod cerrig mawr ar y trac yn atal trenau rhag pasio trwy Dwnnel Blaenau Ffestiniog a bod rhaid gohirio teithiau rhwng y dref a gorsaf Gogledd Llanrwst tan o leiaf fore Gwener.

Yn gynnar bore Iau wedyn dywedodd rheolwyr bod asesiad manwl wedi ei gynnal o'r holl draciau yn y twnnel a'i bod hi'n ddiogel bellach i drenau ailddechrau teithio yn syth.

Ond erbyn hyn maen nhw'n dweud bod dim golwg bod unrhyw greigiau wedi syrthio a bod peirianwyr wedi dod o hyd i fag o folltiau trac.

"Yn dilyn archwiliad o'r twnnel ddoe, fe gadarnhaodd ein peirianwyr bod dim tystiolaeth bod cerrig wedi cwympo," meddai llefarydd ar ran Network Rail.

"Fe ddaethon nhw o hyd i fag yn cynnwys bolltiau trac ar gyfer gwaith cynnal a chadw y gellid fod wedi eu camgymryd fel cerrig.

"Mae gwasanaethau yn ôl i'r drefn arferol, ac rydym yn diolch i gwsmeriaid am fod yn amyneddgar gyda ni wrth i ni archwilio'r twnnel rhag ofn."