Bachgen wedi marw ar ôl cael ei daro gan gar tra'n seiclo
- Cyhoeddwyd
Fe ddigwyddodd y gwrthdrawiad ar yr A4049 rhwng Aberbargod a Phengam
Mae bachgen 12 oed wedi marw yn dilyn gwrthdrawiad gyda char tra'n seiclo yn Sir Caerffili.
Cafodd Cole Roper ei daro gan Vauxhall Astra glas ar yr A4049 rhwng Aberbargod a Phengam am 21:30 nos Sadwrn.
Dywedodd yr heddlu bod dau fachgen 12 oed ar y beic ar y pryd.
Cafodd Cole ei gludo i Ysbyty'r Tywysog Charles ym Merthyr Tudful cyn cael ei drosglwyddo i Ysbyty Athrofaol Cymru yng Nghaerdydd, ble bu farw o'i anafiadau.
Fe gafodd y bachgen arall hefyd ei drin am anafiadau, ond mae bellach wedi cael ei ryddhau o'r ysbyty.
Dywedodd yr heddlu bod teulu Cole yn derbyn cefnogaeth swyddogion arbenigol.
Mae Heddlu Gwent wedi apelio ar unrhyw dystion neu unrhyw un sydd â fideo dashcam o'r ffordd cyn y gwrthdrawiad i gysylltu â'r llu.