Heriau ariannol i wynebu Comisiynydd y Gymraeg

Fe gafodd Aled Roberts ei ddewis fel olynydd Meri Huws ym mis Tachwedd 2018

Mae Comisiynydd y Gymraeg wedi rhybuddio ei fod yn wynebu her ariannol ddifrifol dros y blynyddoedd nesaf.

Wrth gael ei holi gan un o bwyllgorau'r Cynulliad, esboniodd Aled Roberts fod cyllideb wrth gefn y corff yn gostwng i lefelau isel iawn.

Er mwyn arbed arian mae pedair swydd yn cael eu cadw'n wag, esboniodd Mr Roberts wrth y Pwyllgor Diwylliant, y Gymraeg a Chyfathrebu.

Golygai hynny y byddai yna "bwysau gwaith ychwanegol ar staff".

Byddai unrhyw ostyngiad pellach yn "effeithio ar ein gwaith hybu a hyrwyddo a llai o swyddogion ar gael i ddelio a chwynion," ychwanegodd.

'Heriau cyllidol'

Roedd ei ragflaenydd, Meri Huws, wedi rhybuddio y byddai "heriau cyllidol" yn wynebu'r Comisiynydd newydd, gafodd ei benodi ym mis Tachwedd y llynedd.

• Aled Roberts yn Gomisiynydd y Gymraeg

• 'Comisiynydd yn ymchwilio i lai o gwynion'

• Comisiynydd yn galw am 'newid cyfeiriad'

Yn ôl Aled Roberts y prif bryder yw "ariannu'r codiad cyflog a chyfraniadau pensiwn ar gyfer y gwasanaeth sifil".

Gofynnodd David Melding AC, aelod o'r pwyllgor, os yw'r sialens ariannol yn amharu ar allu'r Comisiynydd i weithredu.

Dywedodd Mr Roberts fod ganddo ddyletswydd statudol i ymchwilio i gwynion ac y gallai'r gwaith o hybu a hyrwyddo'r Gymraeg "ddiflannu oherwydd bod yn rhaid rheoleiddio".

"Dwi eisiau hybu a hyrwyddo ond mae o yn bryder," meddai.