Cyhoeddi enw nyrs a fu farw mewn car yn yr afon yn Wyllie

Fe gafodd Laurie Jones ei gweld ddiwethaf yn gadael Ysbyty Athrofaol Cymru yn oriau mân fore Mawrth

Mae Heddlu Gwent wedi cyhoeddi enw menyw gafodd ei chanfod yn farw mewn car yn Afon Sirhywi yn Sir Caerffili ddydd Mawrth.

Roedd Laurie Jayne Jones, 23 o Bontllanfraith ger y Coed Duon wedi ei hadrodd ar goll ar ôl iddi fethu a dychwelyd adref yn dilyn shifft nyrsio yn Ysbyty Athrofaol Cymru.

Dyw'r heddlu ddim yn trin y farwolaeth fel un amheus.

Cafodd swyddogion eu galw i'r B4251 yn Wyllie ger y Coed Duon tua 13:00 ddydd Mawrth.

'Colled drasig'

Dywedodd llefarydd ar ran Heddlu Gwent: "Mae teulu Ms Jones yn derbyn cefnogaeth gan swyddogion arbenigol ac maen nhw'n diolch i bawb am eu geiriau caredig ac am rannu'r apêl i geisio dod o hyd iddi.

"Mae meddyliau pawb yn y llu gyda theulu a ffrindiau Laurie Jones ar hyn o bryd."

Dywedodd llefarydd ar ran Bwrdd Iechyd Caerdydd ar Fro: "Mae pawb yn drist o fod wedi colli Laurie.

"Hoffai'r bwrdd iechyd anfon ein cydymdeimlad i deulu, ffrindiau a chyd-weithwyr Laurie Jones.

"Roedd Laurie yn gweithio fel nyrs plant yn yr uned frys, mae'n golled drasig i'w theulu a'r GIG o fod yn nyrs wnaeth ddewis gyrfa yn gofalu am eraill."