Y Bencampwriaeth: Abertawe 0-1 Millwall

Matt Grimes wedi'r golled i Millwall

Mae Abertawe wedi llithro dau safle yn nhabl y Bencampwriaeth ar ôl colli i Millwall yn Stadiwm Liberty.

Jed Wallace oedd sgoriwr unig gôl y gêm a rwydodd gyda chic rydd wych wedi 65 o funudau.

Wedi hanner cyntaf eithaf diflas, fe lwyddodd yr Elyrch i roi mwy o bwysau ar y gwrthwynebwyr wedi'r egwyl.

Ond ofer oedd eu hymdrechion i unioni'r sgôr wedi gôl Millwall.

Yr eilydd Borja Baston gafodd y cyfle gorau i sicrhau o leiaf pwynt wedi ergyd wan ar ddiwedd symudiad.

Mae'r canlyniad yn golygu bod Abertawe yn chweched yn y Bencampwriaeth wedi'r pedwerydd colled o'u chwe gêm gartref olaf.