Dau yrrwr yn yr ysbyty wedi gwrthdrawiad ger Penisarwaun
- Cyhoeddwyd
Fe ddigwyddodd y gwrthdrawiad ar yr A4244 ger llety Jesse James Bunkhouse
Mae dau yrrwr yn cael triniaeth ysbyty yn Stoke wedi gwrthdrawiad difrifol yng Ngwynedd nos Lun.
Cafodd yr heddlu eu galw gan y gwasanaeth ambiwlans am 18:45 i'r A4244 yn ardal Penisarwaun, rhwng Deiniolen a Llanrug, wedi'r gwrthdrawiad oedd yn cynnwys dau gar lliw arian.
Fe gafodd dynes oedd yn gyrru Nissan Almera a dyn oedd yn gyrru Kia Nero eu cludo mewn hofrennydd i Ysbyty Brenhinol Prifysgol Stoke.
Mae Heddlu Gogledd Cymru'n apelio am wybodaeth a lluniau dash cam gan unrhyw un allai fod wedi gweld y gwrthdrawiad, neu'r cyfnod cyn y gwrthdrawiad
Dywedodd y Sarjant Meurig Jones o'r Uned Plismona'r Ffyrdd eu bod "yn arbennig o awyddus" i glywed gan unrhyw un a welodd y Nissan Almera'n teithio o gyfeiriad yr A4086 yng Nghwm-y-Glo.
Ychwanegodd eu bod yn ddiolch i'r cyhoedd "am eu hamynedd" tra bo'r ffordd ar gau nos Lun "gan fod y digwyddiad yma wedi tarfu ar yr ardal yn sylweddol".