Cyn-chwaraewr Caerdydd, Chris Barker wedi marw yn 39 oed
- Cyhoeddwyd
Chris Barker (dde) yn chwarae i Gaerdydd yn erbyn Robin van Persie ac Arsenal yn 2006
Mae cyn-amddiffynnwr Caerdydd, Chris Barker wedi marw yn 39 oed.
Dywedodd Heddlu De Cymru eu bod wedi dod o hyd i gorff dyn mewn cartref yn ardal Cyncoed y brifddinas tua 14:00 ar Ddydd Calan.
Ychwanegodd yr heddlu nad oedden nhw'n trin y farwolaeth fel un amheus.
Fe chwaraeodd Barker dros 500 o gemau cynghrair, gan gynrychioli'r Adar Gleision rhwng 2002 a 2007.
Chwaraeodd hefyd dros Barnsley, Queens Park Rangers, Plymouth Argyle, a Southend.
'Dyn ffyddlon, dibynadwy'
Mewn trydariad, dywedodd asiantaeth chwaraeon World in Motion fod Barker yn gyn-gleient i'r cwmni a'i fod wedi cael "gyrfa eithriadol fel chwaraewr".
"Yn fwy na hynny, roedd Chris yn berson rhyfeddol, yn ŵr bonheddig ac yn bleser i weithio ag o," ychwanegodd y neges.
Yn dilyn ei farwolaeth, dywedodd cyn-gapten Caerdydd, Darren Purse ar Twitter: "Yn deffro bore 'ma i'r newyddion ofnadwy nad yw Chris Barker gyda ni mwyach.
"Dyn a oedd yn gweithio'n galed, yn ffyddlon a dibynadwy, a bydd colled mawr ar ei ôl. Cwsg yn dawel Barks."