Neil McEvoy 'wedi torri ar draws cyfarfod therapi plentyn'

Mae Neil McEvoy wedi bod yn aelod cynulliad ers 2016

Clywodd panel cyngor bod gwleidydd wedi torri ar draws cyfarfod therapi yn cynnwys plentyn bregus mewn gofal.

Ymddangosodd Neil McEvoy, cynghorydd o Gaerdydd ac Aelod Cynulliad annibynnol, mewn gwrandawiad i ateb honiadau iddo fwlio staff sy'n gyfrifol am y plentyn.

Clywodd iddo geisio cael mynediad i gyfarfod rhwng y plentyn, ei rieni a therapydd.

Dywedodd Mr McEvoy ei fod yn gweithredu ar ran y teulu a oedd yn ofni bod rhywun wedi ymosod ar eu plentyn tra oedd mewn gofal.

Clywodd is-bwyllgor safonau a moeseg Cyngor Caerdydd sut yr arweiniodd ei ymyrraeth gyda'r teulu at roi stop ar gyswllt rhwng y plentyn a'i rieni.

'Bwlio person atebodd y ffôn'

Mae AC Canol De Cymru, sy'n gyn-aelod o Plaid Cymru ond sydd bellach yn eistedd yn annibynnol, yn destun ymchwiliad i honiadau o dorri cod ymddygiad y cyngor.

Dywedwyd wrth y gwrandawiad fod Mr McEvoy wedi ymddwyn mewn ffordd o fwlio tuag at berson yn y cartref a atebodd alwad ffôn gan y gwleidydd.

Dywedodd Mr McEvoy fod ei ymglymiad gyda'r achos wedi galluogi'r rhieni i gael atebion gan y cyngor ynglŷn ag achos eu plentyn.

Ychwanegodd ei fod wedi bod eisiau mynychu'r cyfarfod therapi oherwydd nad oedd y darparwr gofal yn ymwybodol o anghenion addysgol arbennig y plentyn.

Mae'r gwrandawiad yn parhau.