Dechrau ar flwyddyn o hybu gweithgareddau awyr agored

Mae'r ymgyrch yn annog pobl i archwilio parciau cenedlaethol, mynyddoedd, arfordir a safleoedd treftadaeth

Mae profiadau awyr agored "newydd ac unigryw" yn cael eu rhestru ymhlith y rhesymau i ymweld â Chymru eleni, wrth i Croeso Cymru lansio'i brif ymgyrch farchnata flynyddol.

Bydd gig tanddaearol unigryw yn un o brif atyniadau'r gogledd ddiwedd Chwefror yn nodi dechrau dathliad Blwyddyn yr Awyr Agored - y pumed flwyddyn i'r corff ddefnyddio thema benodol i hybu diwydiant ymwelwyr Cymru.

Hefyd bydd ysgol y camp dŵr eFoil gyntaf Cymru yn agor ym Mhorthaethwy ym mis Ebrill a bydd Gŵyl Antur newydd yn cael ei chynnal yn Nyffryn Conwy ym mis Medi.

Dywed Croeso Cymru bod profiadau o'r fath yn "dathlu'r llefydd awyr agored amrywiol a hardd sydd gan y wlad i'w cynnig a chadarnhau ymhellach safle 'Gogledd Cymru' fel prifddinas antur Ewrop".

Mae trefnwyr yr ymgyrch yn gobeithio "annog rhagor o bobl yng Nghymru i gofleidio'r awyr agored a gwneud 2020 y flwyddyn y maent yn archwilio'r parciau cenedlaethol, mynyddoedd, arfordir a Safleoedd Treftadaeth y Byd UNESCO sy'n siapio diwylliant a hunaniaeth Cymru".

80 o docynnau yn unig fydd ar gynnig ar gyfer gig gyntaf ceudwll Bounce Below

Mae rheolwyr atyniad Zip World Bounce Below ym Mlaenau Ffestiniog yn dweud eu bod yn "gyffrous iawn" i gynnal eu gig byw gyntaf erioed fel rhan o'r ymgyrch.

Dim ond 80 o docyn fydd ar gael i weld y cantoresau Kizzy Crawford a Bryde, a'r grŵp Alffa yn perfformio mewn ogof ar 29 Chwefror a bydd rhaid ceisio am rheiny mewn raffl rhwng 17 a 31 Ionawr.

Dywedodd Andrew Hudson, cyfarwyddwr masnachol Bounce Below, bod eleni'n flwyddyn arwyddocaol i'r busnes, sy'n bwriadu agor atyniad newydd yng Nghwm Cynon yn y de.

"Hwn fydd ein lleoliad cyntaf y tu allan i ogledd Cymru," meddai. "Rydyn ni am wneud dros gymunedau glo Cymru yn ne Cymru'r hyn rydyn ni wedi'i wneud dros lechi Cymru yng ngogledd Cymru a chreu cyfleoedd twristiaeth i'r ardal leol."

Mae technoleg hydrofoil yn galluogi'r defnyddiwr i hedfan uwchben dŵr tra'n mwynhau'r golygfeydd o'u cwmpas

O fis Ebrill bydd modd i bobl roi cynnig ar ffordd wahanol o deithio ar hyd y Fenai, wrth i'r cwmni lleol RibRide gynnig sesiynau eFoil - bwrdd syrffio gyda modur trydan sy'n hedfan uwchben adain hydrofoil.

Ychydig iawn o lefydd trwy Ewrop sy'n cynnig technoleg hydrofoil sy'n galluogi'r defnyddiwr i "hedfan uwchben dŵr" gyda "dim ond ychydig o gydbwysedd".

Dywedodd Tom Ashwell, cyd-sylfaenydd RibRide: "Rydyn ni bob amser yn edrych ar ffyrdd i ehangu ar yr hyn rydan ni'n eu cynnig i ymwelwyr, wrth ganolbwyntio ar gynaliadwyedd ar yr un pryd.

"Gellir dysgu hydrofoil mewn un wers yn unig, felly mae'n weithgaredd gwyliau perffaith."

Golygfa o'r pentref Eidalaidd Portmeirion, sy'n rhan o hysbyseb ymgyrch Blwyddyn yr Awyr Agored

Bydd Parc Antur Eryri yn Nolgarrog, Sir Conwy yn llwyfannu ei Ŵyl Antur gyntaf erioed rhwng 25 a 27 Medi.

Bydd y digwyddiad yn rhoi sylw i anturiaethau ar ac oddi ar y safle, ac yn cynnwys sesiynau blasu, gweithdai a dosbarthiadau meistr yn ogystal â darlithoedd, ffilmiau a cherddoriaeth.

"Mae gogledd Cymru yn cael ei ystyried yn un o gyrchfannau mwyaf cyffrous Ewrop ar gyfer pob math o anturiaethau," meddai Andy Ainscough, rheolwr gyfarwyddwr Parc Antur Eryri.

"Bydd ein gŵyl antur yn dod â phobl o'r un anian ynghyd i archwilio ein tirweddau gwych, i ymgymryd â heriau newydd, a chychwyn ar eu hanturiaethau newydd eu hunain."