Arestio dyn ar amheuaeth o lofruddio yn y Coed Duon
- Cyhoeddwyd
Fe ddigwyddodd yr ymosodiad honedig ar Apollo Way am tua 22:00 nos Fawrth
Mae dyn o'r Coed Duon wedi cael ei arestio ar amheuaeth o lofruddiaeth wedi i ddyn farw ar ôl ymosodiad honedig yn y dref.
Cafodd Shane Jones, 33 oed o'r Coed Duon, ei gludo i'r ysbyty ddydd Mercher ar ôl dioddef anafiadau difrifol ar Apollo Way.
Dywedodd Heddlu Gwent ei fod wedi marw yn yr ysbyty o'i anafiadau.
Mae dyn 32 oed wedi cael ei arestio, gyda'r llu bellach yn trin y farwolaeth fel llofruddiaeth.
Dywedodd yr heddlu eu bod yn parhau i apelio am wybodaeth, a'u bod yn awyddus i siarad ag unrhyw dystion i'r digwyddiad ar Apollo Way am tua 22:00 nos Fawrth.