Cwpan Her Ewrop: Gwyddelod Llundain 14-33 Scarlets

Mae'r Scarlets wedi sicrhau eu lle yn rownd wyth olaf Cwpan Her Ewrop ar ôl sicrhau'r fuddugoliaeth pwynt bonws yr oedden nhw ei hangen yn erbyn Gwyddelod Llundain.

Er i Albert Tuisue sgorio cais cynnar i'r tîm cartref, fe wnaeth Corey Baldwin, Dan Jones a Kieran Hardy daro yn ôl i'r Scarlets i sicrhau mantais o 21-7 ar yr egwyl.

Sicrhawyd y pwynt bonws gyda chais gosb cyn i Steff Evans groesi am bumed i'r rhanbarth o Gymru.

Er i Tuisue sgorio ail gail yn hwyr yn y gêm, doedd hynny ddim yn ddigon i fygwth newid y canlyniad.

Mae'n golygu fod y Scarlets yn gorffen yn ail yn y grŵp, ond fel un o'r tri thîm gorau i wneud hynny maen nhw drwyddo i'r rownd nesaf.

Ond maen nhw nawr yn wynebu taith i Toulon - tîm wnaeth eu trechu ddwywaith yn y grŵp - yn y chwarteri.

Mae'r Dreigiau hefyd drwyddo i rownd yr wyth olaf, gan wynebu Bryste oddi cartref, tra bod Caerlŷr yn herio Castres a Bordeaux yn wynebu Caeredin.