Cricieth: Gyrrwr ag 'anafiadau difrifol' wedi gwrthdrawiad

A497 Ffordd PwllheliGoogle Maps

Fe ailagorodd yr A497 Ffordd Pwllheli toc wedi 03:00 fore Gwener

Mae dyn wedi cael "anafiadau difrifol all beryglu bywyd" yn dilyn gwrthdrawiad yng Nghricieth nos Iau.

Dywedodd Heddlu'r Gogledd fod gyrrwr Volkswagen Passat arian wedi bod mewn gwrthdrawiad cyn dod i ardal 30mya ar yr A497 Ffordd Pwllheli.

Cafodd y gwasanaethau brys eu galw tua 21:40 nos Iau ac fe gafodd y dyn ei gludo i Ysbyty Gwynedd ym Mangor.

Mae bellach wedi'i drosglwyddo i ysbyty yn Stoke.

Apeliodd yr heddlu am wybodaeth gan y cyhoedd, gan annog unrhyw un â gwybodaeth i ffonio 101 gan ddyfynnu'r rhif digwyddiad, Y013892.