Agor cwest i farwolaeth ffermwr ger Rhuthun
- Cyhoeddwyd
Roedd y gwrandawian yn cael ei gynnal yn Llys Crwner Rhuthun
Mae cwest wedi ei agor i farwolaeth ffermwr o Ruthun gafodd ei wasgu yn erbyn wal gan fwced cerbyd JCB ar ei fferm ar 21 Ebrill.
Dywedodd y crwner dros ddwyrain a chanolbarth gogledd Cymru, John Gittins, fod Dewi Owen Jones, oedd yn ffermio yn Llanfwrog, wedi ei wasgu rhwng y wal a'r fwced mewn corlan i fuwch oedd newydd roi genedigaeth i lo.
Llwyddodd i ddianc o'r gorlan cyn disgyn yn ddiymadferth ar y buarth.
Gwasanaethau brys
Cafodd ambiwlans awyr a pharafeddygon eu galw i'r fferm, ond roedd Mr Jones yn farw.
Dangosodd archwiliad post mortem fod Mr Jones wedi marw o achos gwaedlyn ar yr abdomen, yn dilyn rhwyg ar ei iau, wedi iddo ddioddef anaf trawma.Mae'r Gweithgor Iechyd a Diogelwch wedi ei hysbysu am y farwolaeth.
Cafodd y cwest ei ohirio ond nid oes dyddiad wedi ei osod eto ar gyfer ei orffen oherwydd y sefyllfa bresennol gyda coronafeirws.