Cwpan Her Ewrop: Toulon 11 - 6 Scarlets
- Cyhoeddwyd
Leigh Halfpenny sicrhaodd holl bwyntiau'r Scarlets, ond bu'n rhaid iddo gael asesiad wedi'r gem ar ôl derbyn cnoc i'w ben
Colli oedd hanes y Scarlets yn erbyn Toulon oddi-cartref yn rownd wyth olaf Cwpan Her Ewrop.
11 i 6 oedd y sgôr terfynol ar ôl gem rwystredig i dim Glen Delaney.
Leigh Halfpenny giciodd holl bwyntiau'r Scarlets yn erbyn ei gyn dim gan roi'r ymwelwyr ar y blaen ar yr hanner.
Ond profodd cais Sergio Parisse y gwahaniaeth wrth i Toulon ddod o'r tu ôl
Roedd dwy gic gosb Leigh Halfpenny wedi rhoi'r Cymry ar y blaen hanner amser.
Buan yn yr ail hanner fe sicrhaodd Louis Carbonel marciau cyfatebol diolch i ddwy gic gosb.
Ac roedd y maswr yn allweddol yn y symudiad a enillodd y gem i'r Ffrancwyr, wrth iddo gymryd y gic yn gyflym gan basio at wythwr yr Eidal, Parisse, a groesodd i ennill y gem.
Does na'r un rhanbarth o Gymru ar ôl yn y gystadleuaeth ar ôl i'r Dreigiau golli yn erbyn Bryste nos Wener.