Rhybudd oren o dywydd garw dros y penwythnos

Mae'r rhybudd oren y berthnasol i fwyafrif siroedd Cymru

Mae'r Swyddfa Dywydd wedi cyhoeddi rhybuddion am law trwm fydd yn effeithio rhan helaeth o Gymru dros y penwythnos.

Bydd rhybudd oren yn dod i rym mewn 17 sir rhwng 12:00 ddydd Sadwrn a 06:00 ddydd Sul wrth i fand o law symud yn araf dros Gymru tua Lloegr.

Mae hynny ar ben rhybudd melyn am law trwm oedd eisoes wedi'i gyhoeddi sy'n berthnasol i Gymru gyfan rhwng 03:00 ddydd Sadwrn a 1200 ddydd Sul.

Mae'r rhybudd oren yn berthnasol i'r siroedd canlynol:

• Blaenau Gwent

• Caerfyrddin

• Caerffili

• Castell-nedd Port Talbot

• Ceredigion

• Conwy

• Dinbych

• Gwynedd

• Merthyr Tudful

• Mynwy

• Penfro

• Powys

• Rhondda Cynon Taf

• Torfaen

• Wrecsam

• Y Fflint

• Ynys Môn

Gall yr amodau achosi llifogydd a thrafferthion teithio.

Fe allai rhai mannau weld 25-50 mm o law, 70-90 mm ar dir uchel ac mae potensial o dros 120 mm ym mannau mwyaf agored ucheldiroedd Eryri.

Dywed y Swyddfa Dywydd hefyd fod "cyfeiriad anarferol y gwynt" yn golygu bod y glaw trymaf yn debygol mewn mannau sy'n fwy cysgodol a sych fel arfer yn ystod cyfnodau o dywydd llai sefydlog.