Clun yn 'ddechrau bywyd newydd' i glaf ifanc

Megan Godfrey a Nerys ei mam

Mae teulu merch o Gaerffili yn dweud fod cael llawdriniaeth ar ei chlun fel "dechrau bywyd newydd" ar ôl dwy flynedd hunllefus.

Mae Megan Godfrey, sy'n 11 oed, ymhlith y cleifion ieuengaf ym Mhrydain i gael clun newydd.

Cafodd ei geni gyda nam ar ei chlun a hwn oedd y pymthegfed tro iddi gael llawdriniaeth arni.

"Doedd dim lot o fywyd gyda Megan cyn y lawdriniaeth," meddai ei mam, Nerys.

"Roedd lot o weithgareddau allgyrsiol wedi mynd mas drwy'r ffenest. Llwyddodd hi i fynd nôl a mlaen i'r ysgol ar ffyn baglau neu gadair olwyn a dyna oedd ei bywyd hi.

"Roedd hi'n dwlu ar ddawnsio, nofio a gymnasteg, yn amlwg gorfod i hwnna i gyd stopio. Doedd e ddim yn fywyd neis iawn i Meg."

Taith anodd

Mae'r teulu wrth eu boddau yn dilyn y lawdriniaeth yn Ysbyty Plant Bryste ond dyw'r wythnosau diwethaf ddim wedi bod yn hawdd.

Cafodd y lawdriniaeth, oedd fod i ddigwydd ar 11 Medi, ei gohirio dair gwaith.

"Oedd e'n gyfnod anodd iawn i ni fel teulu," meddai Nerys. "Oedd e'n anodd i ni baratoi Megan bob tro.

"Mae plentyn 11 oed i fod yn hapus ac yn disgwyl mlaen i neud pethau pob dydd ond yn anffodus doedd hynny ddim yn gallu digwydd gyda ni.

"Ro'n ni'n gorfod ei pharatoi hi tair, pedair gwaith 'to, roedd hwnna'n anodd iawn. O'n i ddim yn gw'bod lle o'n i, o'n i'n becso lot am bethau a Covid-19 yn gynwysedig yn y becso yna."

Mae'r teulu wedi bod yn byw ar wahân ers diwedd Awst am fod Megan yn gorfod hunan-ynysu cyn y lawdriniaeth a'i chwiorydd angen dychwelyd i'r ysgol.

Fe symudon nhw i fyw at eu mam-gu a'u tad-cu ac fe ddechreuodd Meleri, efaill Megan, ysgol uwchradd heb ei chwaer.

Efaill Megan, Meleri (chwith) ac Alys, eu chwaer hynaf

"Mae'r ddwy ohonyn nhw 'di colli mas lot gyda'i gilydd dros yr wythnosau diwetha' yn 'neud pethe newydd gyda'i gilydd a hwn yw'r cyfnod hira mae'r ddwy wedi bod ar wahân."

Fydd y chwiorydd ddim yn dychwelyd adre tan hanner tymor er mwyn i Megan gael amser i gryfhau ar ôl y lawdriniaeth ddiweddara.

"Dwi 'di cael 15 llawdriniaeth," meddai.

"Ges i un pan o'n i'n fabi ac o'n i'n iawn am tua saith mlynedd cyn bod fy nghoes yn mynd yn wael eto ac roedd rhaid i fi gael llawdriniaethau eto."

Mae'r ddwy flynedd ddiwetha wedi bod yn "hunllef" meddai Nerys.

"Mae'n deimlad enfawr o ryddhad fod y lawdriniaeth wedi ei gwneud a mae'n ddechrau bywyd newydd i Meg."

Teyrnged

Mae hi'n talu teyrnged i staff Ysbyty Plant Bryste am y gofal.

"Ni mor lwcus bod yr arbenigedd yna. O'n nhw'n cwmpo dros eu hunain i neud yn siŵr fod Megan yn iawn achos fod cymaint o lawdriniaethau yn y gorffennol heb weithio. Yn ôl Bryste hi yw'r ail berson ifanca yn hanes yr ysbyty i gael y lawdriniaeth."

Mae'r teulu nawr yn edrych ymlaen at weld Megan yn ailymuno mewn pob math o weithgareddau gyda'i chwiorydd.

"Roedd hi'n anodd iawn iddi weld ei chwiorydd yn mynd i gymnasteg, hyd yn oed mynd am wâc fel teulu oedd hi methu rhedeg fel ei chwiorydd, neu neidio mewn i bwll nofio, oedd hi methu 'neud pethau fel hynny.

"Ni jyst ishe cael bywyd nôl fel teulu eto".