Cyhoeddi enw dyn fu farw mewn gwrthdrawiad

Bu farw'r dyn wedi'r digwyddiad ar yr A468 ym Machen

Mae Heddlu Gwent wedi cyhoeddi enw dyn fu farw mewn gwrthdrawiad nos Wener, 13 Tachwedd.

Cafodd Richard Dyas, 30 oed o Gwmbrân ei ladd wrth gerdded ar yr A468 ym Machen, rhwng Caerffili a Chasnewydd.

Bu mewn gwrthdrawiad gyda char Mercedes AMG am tua 20:35 y noson honno.

Cafodd dyn 25 oed o ardal Casnewydd ei arestio ar amheuaeth o achosi marwolaeth trwy yrru'n beryglus.

Mae bellach wedi cael ei rhyddhau tra bod yr ymchwiliad yn parhau.