Pro14: Glasgow 22-23 Dreigiau

Cais godidog gan Jared Rosser ar ddechrau'r gêm yn Stadiwm Scotstoun

Mae'r Dreigiau wedi trechu Glasgow Warriors oddi cartref yn Yr Alban ond dim ond oherwydd bod y tîm cartref wedi methu trosi yn eiliadau olaf y gêm.

Roedd yna ddechrau da i'r Dreigiau yn Stadiwm Scotstoun yn Glasgow a hynny wedi i Jared Rosser sgorio cais ar ei hanner canfed ymddangosiad. Wedi trosiad llwyddiannus gan Sam Davies roedd y Dreigiau ar y blaen o saith i ddim.

Fe ddaeth cic gosb Sam Davies â thri phwynt arall i'r ymwelwyr. Roedd y Dreigiau ond yn chwarae gydag 14 dyn am rannau o'r hanner cyntaf gan bod Harrison Keddie a Jack Dixon wedi cael eu cosbi.

Wedi hanner awr fe ddangosodd yr Albanwyr eu cryfder ac wedi dau gais a throsi llwyddiannus roedd Glasgow ar y blaen hanner amser (14-10).

Roedd yna egni newydd yn chwarae'r Dreigiau yn yr ail hanner wrth i Brok Harris sgorio cais ac wedi trosi llwyddiannus gan Davies a chic gosb gan Glasgow roedd y ddau dîm yn gyfartal am gyfnod (17-17).

Ond yna dyma Sam Davies yn taro eto ac wedi cic gosb a gôl adlam roedd y Dreigiau chwe phwynt ar y blaen (17-23).

Roedd yna gryn bwysau gan Glasgow ar ddiwedd y gêm ac fe lwyddon nhw i sgorio cais yn yr eiliadau olaf ond gan iddynt fethu trosi - y Dreigiau oedd yn fuddugol o drech blewyn.

Y sgôr terfynol Glasgow 22, Y Dreigiau 23.