Dan Lydiate yn dechrau i Gymru yn erbyn Iwerddon

Dyma fydd y tro cyntaf i Lydiate ddechrau gêm dros ei wlad ers Tachwedd 2018

Bydd y blaenasgellwr Dan Lydiate yn dechrau gêm i Gymru am y tro cyntaf ers dros ddwy flynedd wrth herio Iwerddon ym Mhencampwriaeth y Chwe Gwlad ddydd Sul.

Mae Alun Wyn Jones hefyd yn ffit i ddychwelyd fel capten yng ngêm agoriadol Cymru ym mhencampwriaeth eleni, ac mae Adam Beard hefyd yn dychwelyd i'r ail reng.

Mae George North wedi ei ddewis fel canolwr i ennill ei 99fed cap.

Chwaraewr ifanc Caerloyw, Louis Rees-Zammit, sydd wedi ei ddewis ar yr asgell dde, gyda Hallam Amos ar yr asgell chwith.

Dyma fydd ymddangosiad cyntaf Rees-Zammit yn y Chwe Gwlad.

Roedd disgwyl i Alun Wyn Jones golli dechrau pencampwriaeth eleni ar ôl anafu eu ben-glin yng Nghwpan Cenhedloedd yr Hydref

Mae mewnwr Caerdydd, Tomos Williams yn dechrau yn lle Gareth Davies ar ôl colli ymgyrch yr hydref oherwydd anaf, ynghyd â Dan Biggar.

Un arall sy'n dychwelyd yw'r bachwr a chapten y Scarlets, Ken Owens a gollodd ymgyrch yr hydref oherwydd anaf i'r ysgwydd.

Mae'r asgellwyr Liam Williams a Josh Adams yn absennol oherwydd gwaharddiadau - Williams ar ôl cael cerdyn coch mewn gêm rhwng y Scarlets a'r Gleision ym mis Ionawr, ac Adams am dorri rheolau Covid-19.

Tîm Cymru i wynebu Iwerddon:

Leigh Halfpenny; Louis Rees-Zammit, George North, Johnny Williams, Hallam Amos; Dan Biggar, Tomos Williams; Wyn Jones, Ken Owens, Tomas Francis, Adam Beard, Alun Wyn Jones (capten), Dan Lydiate, Justin Tipuric, Taulupe Faletau.

Eilyddion: Elliot Dee, Rhodri Jones, Leon Brown, Will Rowlands, Josh Navidi, Gareth Davies, Callum Sheedy, Nick Tompkins.

Mae Josh Navidi wedi'i gynnwys ar y fainc ar ôl gwella yn dilyn cyfergyd.