Pro14: Dreigiau 20-30 Connacht

Llwyddodd Connacht i drechu'r Dreigiau yn Rodney Parade nos Wener, er gwaethaf hat-tric gan y bachwr Richard Hibbard.

Y tîm cartref sgoriodd bwyntiau cynta'r gêm gyda gôl gosb gan Sam Davies ond aeth y Gwyddelod ar y blaen yn fuan wedi hynny gyda chais gan Matt Healy.

Daeth ail gais i'r ymwelwyr bum munud yn ddiweddarach wrth i Abraham Papali'i groesi'r gwyngalch, cyn i Hibbard daro 'nôl gyda dau gais i'r Dreigiau.

Gôl gosb gan Jack Carty oedd unig bwyntiau eraill yr hanner cyntaf, gan olygu ei bod yn gyfartal 13-13 ar yr egwyl.

Sgoriodd Caolin Blade gais i'r ymwelwyr i'w rhoi ar y blaen ar ddechrau'r ail hanner cyn i Hibbard sgorio ei drydydd cais o'r gêm i'w wneud yn gyfartal unwaith eto.

Ond llwyddodd Connacht i adfer eu mantais gyda chais gan Tom Daly - gan sicrhau pwynt bonws i'r Gwyddelod - cyn i Carty ychwanegu gôl adlam.