Poster etholiadol yn 'adlais' o slogan hiliol

Carrie Harper

Dywed Carrie Harper ei bod yn difaru am 'dramgwyddo'n anfwriadol'

Mae poster etholiadol gan ymgeisydd Plaid Cymru yn etholiad y Senedd wedi cael ei gymharu gyda slogan hiliol o ymgyrch etholiadol o'r 1960au.

Mae poster ymgyrch Carrie Harper, ymgeisydd y blaid yn Wrecsam yn dweud: "Don't want a Tory for a neighbour? Vote Plaid Cymru, not Labour."

Dywedodd y Blaid Lafur Gymreig ei fod yn "neges wleidyddol wedi'i hysbrydoli gan yr hiliaeth yn Smethwick" - cyfeiriad at slogan y Torïaid yn y sedd honno yng ngorllewin canolbarth Lloegr, yn etholiad cyffredinol 1964.

Dywedodd Ms Harper ei bod yn edifar iawn ganddi bod yr "iaith a ddefnyddiwyd wedi tramgwyddo'n anfwriadol... ac nid dyna oedd y bwriad o gwbl".

Lleoliad y poster

Mewn datganiad dywedodd Ms Harper, sy'n aelod o Gyngor Sir Wrecsam, bod yr hysbyseb wedi cael ei dynnu i lawr, ac eglurodd ei bod wedi cynnwys y gair "neighbour" er mwyn cyfeirio at y ffaith bod lleoliad y poster y drws nesaf i swyddfa AS Ceidwadol Wrecsam, Sarah Atherton.

"Dwi eisiau canolbwyntio ar ymgyrch bositif wedi'i hanelu at ddanfon gwir newid i'r gymuned lle ges i fy magu a lle dwi'n byw," meddai.

Carrie Harper/twitter

Yr hysbyseb sydd wedi achosi'r ffrae

Mewn sylw ar Twitter dywedodd Llafur Cymru "Un ai mae Plaid Cymru'n naïf a ddim yn gwybod sut mae hyn yn swnio neu nid oes ots ganddyn nhw.

"Dylai addasiadau o sloganau Smethwick 1964 aros yn y gorffennol."

'Slogan ofnadwy'

Dywedodd llefarydd ar ran y Ceidwadwyr Cymreig: "Mae hyn yn sarhad ar dros hanner miliwn o bobl a bleidleisiodd dros y Ceidwadwyr Cymreig yn 2019.

"Os yw pobl Wrecsam am weld newid wedi 22 mlynedd o lywodraeth Lafur yng Nghymru, ac Aelod o'r Senedd parchus a gweithgar dylent bleidleisio i Jeremy Kent."

Dywedodd Tim Sly, ymgeisydd y Rhyddfrydwyr Democrataidd: "Mae sloganau fel hyn yn ofnadwy, yn rhwygo, ac nid oes lle iddynt mewn gwleidyddiaeth a dylai'r rhai sy'n gyfrifol am ysgrifennu a rhannu'r slogan hon fod â chywilydd.

"Mae angen gofyn cwestiynau difrifol am farn y rhai a ddewisodd y slogan hwn a'u haddasrwydd i wasanaethu."

Ymgeiswyr sedd Wrecsam:

  • Plaid Diddymu'r Cynulliad Cymreig - Paul Ashton

  • Llafur - Lesley Griffiths

  • Plaid Cymru - Carrie Harper

  • Reform UK - Ian Berkeley-Hurst

  • Ceidwadwyr - Jeremy Kent

  • Gwlad - Aaron Norton

  • Y Blaid Werdd - Duncan Rees

  • UKIP- Sebastian Ross

  • Rhyddfrydwyr Democrataidd - Tim Sly

Pynciau cysylltiedig