Achub dyn, plentyn a chi o fwd ar draeth yn Llanelli
- Cyhoeddwyd
Bu'n rhaid achub dyn, plentyn a chi oedd wedi mynd yn sownd mewn mwd ar draeth yn Sir Gâr brynhawn Mercher.
Cafodd y gwasanaethau brys eu galw i draeth oddi ar hen Ddoc y Gogledd, Llanelli ychydig cyn 15:00.
Cafodd criwiau tân eu danfon o Lanelli ac Abertawe i achub y dyn, y ferch a'r ci.
Roedd yr heddlu, y gwasanaeth ambiwlans a Gwylwyr y Glannau hefyd yn rhan o'r ymdrech.
Cafodd y gwasanaethau brys eu galw ychydig cyn 15:00 brynhawn Mercher
Dywedodd Gwasanaeth Tân ac Achub y Gorllewin a'r Canolbarth fod criwiau wedi cyrraedd y tri "a'u gosod ar fatiau mwd cyn gweithio gyda staff Gwylwyr y Glannau i'w cludo i ddiogelwch".
Dywedodd Gwylwyr y Glannau eu bod wedi danfon criwiau o Borth Tywyn a Llansteffan, wedi i Heddlu Dyfed-Powys gysylltu â nhw am gymorth.
Roedd y mwd yn "drwchus" yn ôl llefarydd. "Cafodd yr offer achub o fwd arferol ei ddefnyddio, gan gynnwys sled, rhaffau a phwlïau."
Nid oedden nhw angen triniaeth feddygol, ac roedd y digwyddiad ar ben erbyn 17:10.