Pedwerydd dyn wedi'i gyhuddo o lofruddio Tomasz Waga

Aelod o'r cyhoedd ddaeth o hyd i gorff Tomasz Waga ar stryd yn ardal Pen-y-lan, Caerdydd

Mae ditectifs sy'n ymchwilio i farwolaeth Tomasz Waga yng Nghaerdydd ym mis Ionawr eleni wedi cyhuddo pedwerydd person mewn cysylltiad â'i lofruddiaeth.

Bydd Ardit Mehalla, 24, o Enfield yn Llundain yn ymddangos ger bron Llys Ynadon Caerdydd ddydd Llun, 3 Mai.

Mae dyn 41 oed o'r Tyllgoed yng Nghaerdydd, a gafodd hefyd ei arestio ddydd Sadwrn ar amheuaeth o lofruddiaeth, wedi ei ryddhau ar fechniaeth yr heddlu tra bod ymchwiliad pellach yn cael ei gynnal.

Mae tri dyn arall eisoes wedi cael eu cyhuddo mewn cysylltiad â llofruddiaeth Tomasz Waga ac wedi'u cadw yn y ddalfa.

Cafodd Tomasz Waga o Wlad Pwyl, ond oedd yn byw yn Essex, ei ganfod yn anymwybodol ar Ffordd Westville, Pen-y-lan, ar 28 Ionawr tua 23:30.