Tywydd garw'n cau ffyrdd mewn rhannau o Gymru

Rhybudd tywydd 3 MaiMet Office

Mae'r rhybudd yn berthnasol i 17 o siroedd Cymru

Cafodd yr A5 ei chau i'r ddau gyfeiriad ar ôl i goeden fawr gael ei chwythu drosodd yn ystod y tywydd garw a darodd Cymru ddydd Llun, Gŵyl y Banc.

Cyhoeddodd y Swyddfa Dywydd rybudd melyn am wyntoedd cryf iawn ar draws rhan helaeth o Gymru rhwng brynhawn Llun a bore Mawrth.

Cafodd yr A5 ei chau ger Pont-y-Pandy (Pont Halfway) ger Bethesda am tua 15:00, ac roedd pryder ar un adeg y byddai'n debygol o fod felly am beth amser, oherwydd maint y goeden.

Mae'r A5 bellach wedi ailagor, a hefyd ffordd osgoi Dolgellau ar yr A470, oedd ynghau am tua awr oherwydd llifogydd.

Dywedodd cwmni Scottish Power bod nifer o ardaloedd wedi dioddef toriadau i'r cyflenwad trydan ym Môn a Gwynedd, yn cynnwys ardaloedd Biwmares, Amlwch, Caergybi, Llanfairfechan a Phwllheli.

Yn y de roedd Pont Cleddau ar yr A477 yn Sir Benfro ar gau i gerbydau uchel a beiciau modur.

Roedd cyfyngiadau mewn grym ar yr M4 dros Bont Hafren hefyd, a dywed yr awdurdodau fod posibilrwydd y bydd rhaid cau'r bont os yw'r sefyllfa'n gwaethygu yno.

Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
Nid yw'r BBC yn gyfrifol am gynnwys safleoedd allanol
I osgoi neges twitter gan Traffig Cymru Gogledd-Chanolbarth #DiogeluCymru

Caniatáu cynnwys Twitter?

Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Daeth y rhybudd tywydd i rym am 12:00 a bydd yn para tan 09:00 fore Mawrth.

Mae'n berthnasol i dde Cymru a rhan helaeth o'r arfordir gorllewinol.

Dywed yr arbenigwyr bod potensial i'r tywydd achosi trafferthion i deithwyr, difrod i goed ac adeiladau dros do, a thonnau mawr mewn mannau arfordirol.

Yn ôl y Swyddfa Dywydd, mae gwyntoedd yn debygol o fod mor uchel â 60 i 65mya mewn rhannau arfordirol, a rhwng 40 a 50mya mewn ardaloedd mewndirol.

Mae'r rhybudd yn berthnasol i 17 o siroedd Cymru:

  • Abertawe

  • Blaenau Gwent

  • Bro Morgannwg

  • Caerdydd

  • Caerfyrddin

  • Caerffili

  • Casnewydd

  • Castell-nedd Port Talbot

  • Ceredigion

  • Gwynedd

  • Merthyr Tudful

  • Mynwy

  • Penfro

  • Pen-y-bont ar Ogwr

  • Powys

  • Rhondda Cynon Taf

  • Torfaen

Pynciau cysylltiedig