Gemau Paralympaidd Tokyo: Tri o Gymru yn nhîm Prydain
- Cyhoeddwyd
Y Cymry sydd yn y dwsin: Sabrina Fortune, Aled Sion Davies a Hollie Arnold
Mae triawd o Gymru wedi cael eu cynnwys yn y don gyntaf o 12 dewis ar gyfer tîm athletau Prydain ar gyfer Gemau Paralympaidd Tokyo.
Bydd y pencampwr byd taflu pwysau Sabrina Fortune, Aled Sion Davies (taflu pwysau) a Hollie Arnold (gwaywffon) yn cynrychioli Prydain yn Japan ym mis Awst.
Mae Hannah Cockroft, Richard Whitehead, Jo Butterfield, Jonathan Broom-Edwards, Maria Lyle a Sophie Hahn i gyd wedi eu henwi hefyd.
Mae chwech o enillwyr medalau aur Rio 2016 - gan gynnwys Davies ac Arnold - ymysg y dwsin.
Bydd y rhedwr Thomas Young yn gwneud ei ymddangosiad Paralympaidd cyntaf.
Mae'r raswyr cadeiriau olwyn Kare Adenegan ac Andrew Small, sydd â medalau byd a Pharalympaidd i'w henw, yn cwblhau'r 12.
Bydd cyhoeddiad am weddill y tîm ar 21 Gorffennaf cyn dechrau'r Gemau ar 24 Awst.
Enillodd Prydain 33 medal, gan gynnwys 15 aur, yn Rio bum mlynedd yn ôl.