Cyhuddo menyw wedi i blentyn farw mewn gwrthdrawiad

Mae blodau a theganau wedi'u gadael ger safle'r digwyddiad ar Heol Goffa

Mae menyw 23 oed wedi cael ei chyhuddo o droseddau gyrru ar ôl i blentyn farw mewn gwrthdrawiad yn Llanelli nos Wener.

Mae Lucy Dyer o'r dref wedi'i chyhuddo o achosi marwolaeth trwy yrru'n beryglus ac o yrru dan ddylanwad alcohol.

Cafodd Heddlu Dyfed-Powys eu galw i'r gwrthdrawiad rhwng BMW glas a Vauxhall glas ar groesffordd Heol Goffa yn Llanelli am tua 21:00.

Dywedodd y llu y bu farw plentyn oedd yn teithio yn un o'r cerbydau o ganlyniad i'r gwrthdrawiad. Dydyn nhw ddim wedi manylu am oedran y plentyn.

Mae disgwyl i Ms Dyer, oedd yn teithio yn y cerbyd arall, ymddangos yn y llys ddydd Llun.