Ioan Wynne Rees yn ennill Medal Gyfansoddi Eisteddfod yr Urdd

Ioan Wynne Rees o Gyffylliog, Rhuthun yw enillydd Medal Gyfansoddi Eisteddfod yr Urdd 2020-21.

Cafodd canlyniad y gystadleuaeth ei gyhoeddi ar blatfformau digidol yr Urdd nos Fawrth wrth i'r mudiad ieuenctid wobrwyo gwaith cyfansoddi buddugol a ddaeth i law cyn cyfnod clo cyntaf y pandemig yng ngwanwyn y llynedd.

Daeth i'r brig gyda gwaith o'r enw 'Caneuon Clodfawr: Pum Cân o Glwyd i Denor', sef gosodiad o eiriau I D Hooson, Gwilym R Jones ac R Williams Parry.

Cyfansoddiad arall gan Ioan ddaeth yn ail yn y gystadleuaeth, a Gwydion Powel Rhys o Rachub, Dyffryn Ogwen a ddaeth yn drydydd.

Cyfansoddiadau Ioan Wynne Rees ddaeth yn gyntaf ac ail yn y gystadleuaeth

Mae Ioan bellach yn byw ym Mangor ac yn gweithio fel tiwtor gyda Gwasanaeth Cerdd Ysgolion Gwynedd a Môn, wedi iddo gwblhau Gradd M.A. mewn Cerddoriaeth, oedd yn canolbwyntio ar ganu roc Cymraeg.

"Nes i greu cylch o ganeuon oedd yn seiliedig ar eiriau am Ddyffryn Clwyd gan awduron neu feirdd o Ddyffryn Clwyd, ac oedd yn clodfori'r ardal - dyna le mae'r teitl 'Caneuon Clodfawr' yn dod, sef o'r dywediad 'Dyffryn Clodfawr Clwyd'," meddai.

"Nes i gyflwyno'r casgliad i fy ffrind a'r tenor Dafydd Wyn Jones achos ro'n i'n meddwl am ei lais wrth eu cyfansoddi.

"Mae ennill y gystadleuaeth gyda chaneuon am Ddyffryn Clwyd, ar gyfer yr Eisteddfod oedd 'i fod' yn Sir Ddinbych, yn golygu lot i mi."

• Megan Hunter yn ennill Coron Eisteddfod yr Urdd

Mae Ioan yn derbyn medal wedi'i chreu gan gwmni gemwaith Rhiannon, Tregaron, am y gwaith buddugol.

Gwydion Powel Rhys, sy'n astudio Cyfansoddi yng Ngholeg Cerdd Frenhinol Llundain, ddaeth yn drydydd

Dywedodd beirniad y gystadleuaeth, Mared Emlyn fod alawon Ioan wedi'u cyfansoddi yn "ystyrlon", ac yn "werth eu clywed".

"Mae'r casgliad hefyd yn gweithio fel cyfanwaith ac felly yn sicr yn gylch o ganeuon," meddai.

"Mae'r llais yn cael ei arddangos yn dda ond beth sy'n aros yn y cof yw nad yw'r cyfansoddwr wedi anghofio pwysigrwydd y piano, a'r berthynas rhyngddo â'r llais.

"Dyma gyfeiliant diddorol, addas, nad yw'n undonog nac yn ddiddychymyg ac mae'r llais a'r cyfeiliant yn cydweithio'n gelfydd iawn."

Mae Ioan yn derbyn medal wedi'i chreu gan gwmni gemwaith Rhiannon, Tregaron, am y gwaith buddugol

Am yr ail flwyddyn, oherwydd y pandemig, bu'n rhaid gohirio Eisteddfod yr Urdd Sir Ddinbych 2020, ac fe drefnwyd Eisteddfod T unwaith eto eleni i lenwi peth o'r bwlch.

Cafodd canlyniad y Goron ei gyhoeddi nos Lun, a bydd y Fedal Ddrama yn cael ei gyhoeddi nos Fercher, a'r Gadair nos Iau.