Y Bencampwriaeth: Caerdydd 0-1 Queens Park Rangers

Dyw Caerdydd heb ennill yn eu 10 gêm ddiwethaf bellach, wedi iddyn nhw gael eu trechu gan Queens Park Rangers yn Stadiwm Dinas Caerdydd nos Fercher.

Aeth yr ymwelwyr ar y blaen wedi 37 munud, gydag Andre Gray yn rhwydo yn dilyn pas dda gan Andre Dozzell.

Gyda chwarter awr yn weddill bu bron i bethau fynd o ddrwg i waeth i Gaerdydd, wrth i'r capten Sean Morrison rwystro ergyd Lyndon Dykes ar y llinell gôl i'w atal rhag dyblu'r fantais.

Er hynny roedd QPR eisoes wedi gwneud digon i selio'r triphwynt, a hynny yn ail gêm y rheolwr dros dro, Steve Morison wrth y llyw.

Er iddo gael gêm gyfartal yn erbyn Stoke dros y penwythnos - gan ddod â rhediad o wyth colled yn olynol i ben - mae'r canlyniad yn golygu nad ydy Caerdydd wedi ennill gêm ers 12 Medi.

Mae'r Adar Gleision yn aros yn y 21ain safle yn y Bencampwriaeth - un pwynt ac un safle yn unig yn uwch na safleoedd y cwymp.