Arestio tri ar amheuaeth o gaethwasiaeth fodern yn Llandudno

Mae tri dyn wedi cael eu harestio ar amheuaeth o droseddau caethwasiaeth fodern

Mae tri o bobl wedi cael eu harestio ar amheuaeth o droseddau caethwasiaeth fodern mewn cysylltiad â gwesty yn Llandudno.

Dywedodd un gweithiwr ei bod hi'n cael ei gorfodi i fyw mewn cwpwrdd heb gyfleusterau ymolchi.

Cafodd tri o ddynion eu harestio ar 3 Tachwedd ar amheuaeth o orfodi pobl i weithio a masnachu pobl.

Mae dwy ddynes yn eu 30au wedi eu diogelu ac mae ymchwiliadau'n parhau.

'Byw mewn cwpwrdd'

Dywedodd y ddwy weithiwr wrth yr Awdurdod Gangiau a Chamdrin Gwaith (GLAA) eu bod yn cael eu talu £250 y mis am hyd at 60 awr o waith yr wythnos mewn gwesty yn Llandudno.

Dywedon nhw eu bod dan gyfarwyddyd i ddweud celwydd am eu horiau gwaith, a byddai dau o'r rheiny gafodd eu harestio yn ymweld â'r gwesty i asesu eu gwaith.

Yn ôl un, bu'n rhaid iddi fyw mewn cwpwrdd.

Mae'r ddwy bellach yn derbyn cymorth arbenigol.

Mae'r tri wedi cael eu rhyddhau dan ymchwiliad

Cafodd tri dyn eu harestio; dyn 46 oed yn Newcastle-under-Lyme, dyn 21 oed yn Stoke-on-Trent, a dyn 36-oed yn Llandudno, a'u rhyddhau dan ymchwiliad.

Mae'r heddlu yn annog pobl i fod yn ymwybodol o arwyddion caethwasiaeth fodern, sydd yn cynnwys oriau hir, gwarchod gweithwyr, diffyg eiddo personol, diffyg bwyd, a cham-drin.