Dyn 19 oed yn y llys wedi ymosodiad yng nghanol Caerdydd

Cafodd yr heddlu eu galw i'r digwyddiad am tua 16:30 brynhawn Gwener

Mae dyn yn ei arddegau wedi bod o flaen llys wedi ei gyhuddo o ymosod a bod â chyllell yn ei feddiant yn dilyn digwyddiad yng nghanol Caerdydd ddydd Gwener.

Cafodd yr heddlu eu galw i'r digwyddiad yn dilyn adroddiadau o ffrwgwd ger marchnad Caerdydd ar Heol Eglwys Fair.

Cafodd dau o bobl eu cludo i'r ysbyty ar ôl cael eu trywanu ond ni chredir bod yr anafiadau yn rhai sy'n peryglu bywyd.

Yn Llys Ynadon Caerdydd fore Llun, fe siaradodd Ivan Ania Hernandez, sy'n 19 oed ac yn dod o ardal Cathays y brif ddinas, ond i gadarnhau ei enw a'i ddyddiad geni.

Ni chafodd cais ei wneud am fechnïaeth, a bydd yn cael ei gadw yn y ddalfa tan fod disgwyl iddo ymddangos o flaen Llys y Goron Caerdydd ar 6 Rhagfyr.