Gohirio streic gyrwyr bysus Arriva yn y gogledd

Aelodau Unite yn protestio ger safle Arriva ym Mangor fore Mawrth

Mae streic gyrwyr bysiau Arriva yn y gogledd wedi cael ei gohirio ar ôl i'r cwmni gynnig tâl gwell i'r gweithwyr.

Dywedodd undeb Unite y bydd gyrwyr yn dychwelyd i'w gwaith tra bod pleidlais yn cael ei chynnal ymysg y gweithwyr ynglŷn â sut i ymateb i'r cynnig.

Does dim bysus Arriva wedi bod yn rhedeg mewn rhannau helaeth o'r gogledd ers dydd Sul.

Roedd Unite wedi dweud eu bod yn barod i streicio am bum wythnos.

• Streic bysus yn 'drychinebus' i deithwyr a busnesau

• Gyrwyr bws Arriva i fynd ar streic o ddydd Sul

Mae'r undeb yn dweud bod gyrwyr yn ennill tâl uwch yng ngogledd-orllewin Lloegr nag yng ngogledd Cymru, ac mai hynny sydd wedi arwain at y gweithredu diwydiannol.

Yn ôl Unite, mae gyrwyr dros y ffin yn ennill tua £1.80 yn fwy yr awr na gyrwyr yn y gogledd.

Dywedodd yr undeb ddechrau'r wythnos y byddai'r streic yn parhau tan fod cynnig "derbyniol" o dâl yn cael ei gyflwyno a'i dderbyn gan y gweithlu.

Does dim bysus Arriva wedi bod yn rhedeg mewn rhannau helaeth o'r gogledd ers dydd Sul

Dywedodd swyddog rhanbarthol Unite, Jo Goodchild brynhawn Iau eu bod yn "gohirio'r gweithredu diwydiannol yn dilyn cynnig tâl gwell gan y cyflogwr".

"Fe fyddwn nawr yn cynnal pleidlais ymysg ein haelodau ynglŷn â'r cynnig newydd."

Pan gafodd y streic ei chyhoeddi dywedodd Arriva eu bod wedi "gweithio'n ddiflino" i'w hosgoi, a'u bod wedi cyflwyno "sawl cynnig gwell" i'r undeb fyddai wedi codi cyflogau i £12 yr awr yn 2022.

Dywedodd y cwmni ddydd Iau y bydd y gwasanaethau yn ailddechrau fore Gwener, ond efallai y bydd oedi yn gynnar yn y bore.

"Mae hyn yn newyddion da i'n cwsmeriaid yng ngogledd Cymru a Chaer ac rydyn ni'n falch bod ein trafodaethau'r wythnos hon wedi gweld y ddwy ochr yn ymrwymo i ganfod ffordd ymlaen fel y gall gwasanaethau ailddechrau," meddai llefarydd.

Roedd y streic yn effeithio ar ganolfannau'r cwmni yn Amlwch, Bangor, Penarlâg, Llandudno, Y Rhyl a Wrecsam.