Y Bencampwriaeth: Caerdydd 0-1 Blackburn Rovers
- Cyhoeddwyd
Chwarae mewn stadiwm wag oedd hanes Caerdydd wrth iddynt groesawu Blackburn Rovers, un o'r timau sydd ar frig y Bencampwriaeth, brynhawn Sadwrn.
Ar ôl llai na chwarter awr roedd Caerdydd wedi ildio gôl - cafodd Joe Rothwell le ar ymylon y blwch cosbi a rhoi ergyd droed dde gadarn i gornel y rhwyd.
Roedd yr hanner cyntaf yn gymharol gyfartal ar ôl hynny gyda'r un o'r ddau dîm yn creu llawer o gyfleoedd da.
Er iddynt gael mwyafrif o'r meddiant roedd yr Adar Gleision yn gorffen yr hanner cyntaf yn colli o un gôl i ddim.
Roedd Caerdydd yn fwy ymosodol yn yr ail hanner, ond eto heb lwyddiant a gyda hanner awr i fynd fe wnaeth Steve Morrison, rheolwr Caerdydd, rai newidiadau - Isaak Davies a Marlon Pack yn dod i'r cae.
Aeth Blackburn i lawr i ddeg dyn wedi i Ryan Nyambe lorio Perry Ng.
Yn fuan wedyn daeth chwaraewr ifanc arall i'r cae i Gaerdydd - Rubin Calwill yn lle Cody Drameh.
Roedd y chwarae yn fywiog iawn yn y munudau olaf a Chaerdydd yn bygwth o hyd ond heb lwyddiant.
Crafu buddugoliaeth wnaeth Blackburn Rovers a'r Adar Gleision yn colli brwydr gorfforol galed unwaith eto ar dir eu hunain.