Y Bencampwriaeth: Bristol City 3-2 Caerdydd
- Cyhoeddwyd
Doedd Chris Martin heb sgorio gartref ers gêm gynta'r tymor cyn iddo rwydo ddwywaith yn erbyn Caerdydd
Cafodd Caerdydd eu trechu gan Bristol City yn Ashton Gate brynhawn Sadwrn, gan olygu eu bod bellach wedi mynd chwe gêm gynghrair heb fuddugoliaeth.
Aeth yr Adar Gleision ar y blaen wedi hanner awr, wrth i'r ymosodwr James Collins benio croesiad Tommy Doyle - oedd yn gwneud ei ymddangosiad cyntaf i'r clwb - i gefn y rhwyd.
Ond o fewn dau funud roedd hi'n gyfartal unwaith eto, gyda Chris Martin yn crymanu'r bêl heibio i'r golwr Alex Smithies i'r gornel isaf.
Daeth ail gôl i'r tîm cartref wedi awr o chwarae, wrth i Martin rwydo eto i roi'r tîm o Fryste ar y blaen am y tro cyntaf.
Ychwanegodd Andreas Weimann drydedd gyda chwarter awr yn weddill, ac er i Max Watters sgorio gôl hwyr i'r ymwelwyr, roedd Bristol City eisoes wedi gwneud digon i selio'r fuddugoliaeth.
Mae'r canlyniad yn golygu fod Caerdydd yn aros yn yr 20fed safle am y tro - bedwar pwynt o safleoedd y cwymp.