Anaf difrifol i feiciwr modur wedi gwrthdrawiad ym Môn
- Cyhoeddwyd
Fe ddigwyddodd y gwrthdrawiad yng nghyffordd stad ddiwydiannol Gaerwen
Mae beiciwr modur wedi cael anafiadau all beryglu bywyd yn dilyn gwrthdrawiad difrifol ar Ynys Môn.
Fe gafodd y gwasanaethau brys eu galw i'r A5 yn Gaerwen am 17:01 brynhawn Mercher yn dilyn adroddiad o wrthdrawiad rhwng beic modur a VW Tiguan yn ardal cyffordd y stad ddiwydiannol.
Cafodd y dyn oedd ar y beic modur ei gludo mewn hofrennydd i ysbyty yn Aintree.
Dywedodd Heddlu Gogledd Cymru nos Fercher bod "y ffordd yn parhau ar gau" yn ystod eu hymchwiliadau cychwynnol.
"Rwy'n annog unrhyw un oedd o bosib yn yr ardal a allai fod â lluniau dash cam i gysylltu â ni," meddai'r Sarjant Medwyn Williams o Uned Plismona'r Ffyrdd y llu.
"Hoffwn ddiolch i aelodau'r cyhoedd a stopiodd i roi cymorth yn safle'r gwrthdrawiad."