Prif weithredwr Golwg, Siân Powell yn gadael ei swydd

Dywed Siân Powell ei bod yn rhoi gorau i'w swydd er mwyn canolbwyntio ar ei theulu ifanc

Mae Prif Weithredwr Cwmni Golwg wedi cyhoeddi y bydd yn gadael ei swydd er mwyn canolbwyntio ar ei theulu ifanc.

Mewn datganiad ar ei chyfrif Twitter dywedodd Siân Powell bod "y cyfnod diwethaf wedi dod â sawl her ond yn bersonol yr un mwyaf i mi yw sicrhau balans rhwng fy swydd a theulu ifanc, felly ers cael trydydd plentyn dwi wedi penderfynu camu lawr o fy rôl i ganolbwyntio ar amser teulu".

Ychwanegodd ei bod wedi bod yn fraint bod yn rhan o dîm Golwg a'i bod yn "falch o fod wedi chwarae rôl am gyfnod yn hanes y cwmni".

"Mewn cyfnod heriol dwi'n falch o'r hyn 'da ni wedi'i gyflawni - o lansio Golwg+ i wefan newydd @Golwg360 a'r holl ddatblygiadau gyda @Bro_360," meddai.

Owain Schiavone fydd yn ei holynu dros dro nes y bydd rhywun yn cael ei benodi yn barhaol.

Ym mis Ionawr fe adawodd Garmon Ceiro ei swydd fel golygydd cylchgrawn Golwg a gwefan newyddion Golwg 360.

• Cwmni Golwg yn penodi prif weithredwr newydd

• Colli cof newyddiaduraeth Gymraeg

• Bro360: Lansio cynllun gwefannau lleol

Fe ddechreuodd Siân Powell ar ei swydd yn Awst 2019 gan olynu Dylan Iorwerth a sefydlodd y cwmni yn 1988.

Mae gan Ms Powell, sydd o Ynys Môn yn wreiddiol, gefndir o ddarlithio mewn newyddiaduraeth a chynnal busnes ei hun fel ymgynghorydd ym maes cyfathrebu.

Adeg ei phenodi dywedodd Ms Powell: "Mae'r cyfle hwn i arwain Golwg yn fraint.

"Dwi'n edrych ymlaen at ymuno â'r tîm talentog a chreadigol wrth i ni weithio i gryfhau newyddiaduraeth Cymru."