Pencampwriaeth Rygbi Unedig: Bulls 57-12 Scarlets

Er gwaethaf ymdrechion y Scarlets fe gollon nhw'n drwm yn erbyn y Bulls yn Pretoria

Fe gollodd y Scarlets yn drwm yn erbyn y Bulls yn Pretoria nos Wener.

Roedd y tîm cartref yn fygythiad o'r cychwyn cyntaf wrth iddyn nhw sicrhau cais o fewn munud yn stadiwm Loftus Versfeld ac fe fu bron iddynt sicrhau cais arall o fewn tair munud ond oherwydd bod y bas ymlaen chafodd e ddim mo'i ganiatáu.

Ond doedd dim rhaid iddyn nhw oedi llawer yn hwy cyn sicrhau mwy o geisiau - wedi hanner awr o chwarae roedd y Bulls wedi sgorio pum cais a'r sgôr yn 31-0.

Ymhen tair munud roedd yna gais i'r Scarlets gan Sione Kalamafoni ac erbyn hanner amser roedd y sgôr yn 31-7.

Ar ddechrau'r ail hanner cerdyn melyn i Ioan Nicholas am chwarae peryglus a chweched cais i'r Bulls wedi rhyng-gipiad llwyddiannus (38-7).

Ond nid dyna ddiwedd y ceisiau - wedi 52 munud cais hyd cae i'r Bulls ac yn fuan dau gais arall (57-7).

Roedd yna gais cysur i'r Scarlets, serch hynny, ar ddiwedd y gêm wrth i Rob Evans groesi - ac felly y sgôr terfynol oedd 57-12.