Galw ar bobl i barhau i ynysu ar ôl diddymu'r rheolau

Fe ddylai pobl barhau i hunan-ynysu os oes ganddyn nhw symptomau Covid a gwisgo mygydau hyd yn oed pan fydd y gofynion cyfreithiol i wneud hynny yn dod i ben, yn ôl arbenigwr ar iechyd cyhoeddus.

Mae disgwyl i'r cyfreithiau ar wisgo mygydau a hunan-ynysu ddod i ben ddiwedd y mis.

Ond dywedodd Dr Giri Shankar o Iechyd Cyhoeddus Cymru y dylai pobl barhau i ynysu os oes ganddyn nhw Covid er mwyn gwarchod eraill.

Ychwanegodd, er bod yr "angen cyfreithiol" i hunan-ynysu a gwisgo mwgwd yn cael ei ddiddymu, nad yw'r "angen meddygol" i wneud hynny yn dod i ben hefyd.

'Cyfrifoldeb ar unigolion'

Mae'r Prif Weinidog Mark Drakeford wedi dweud hefyd y bydd pobl yn cael eu cynghori i wisgo mygydau pan fydd yr holl reolau Covid yn cael eu diddymu.

Mae nifer yr heintiadau yn parhau ar gynnydd yng Nghymru, yn ôl y Swyddfa Ystadegau Gwladol, gydag amcangyfrif fod un ym mhob 25 person â Covid yn yr wythnos ddiweddaraf.

Bydd y gallu i bawb gael profion llif unffordd am ddim yn dod i ben fis Mehefin

Dywedodd Dr Shankar y bydd "cyfrifoldeb yn symud i unigolion" er mwyn gwarchod ein gilydd.

"Ar y lleiaf, ry'n ni'n credu y dylai amryw o'r mesurau barhau, fel golchi dwylo, derbyn brechiadau, gwisgo mygydau, a phwysicaf oll, pan mae gennych chi symptomau, fe ddylech chi wneud prawf," meddai.

"Os oes gennych chi symptomau neu'n cael prawf positif, fe ddylech chi barhau i hunan-ynysu, er nad oes gorfodaeth gyfreithiol i wneud hynny."

'Newid diwylliant'

Ychwanegodd Dr Shankar fod "angen newid diwylliant" o ran pobl yn mynd i'r gwaith pan eu bod yn wael.

"Mae hynny'n rhywbeth ry'n ni'n gweld yn eithaf aml yn y GIG a gofal cymdeithasol hefyd - pobl yn teimlo fod yn rhaid iddyn nhw fod yn y gwaith er bod ganddyn nhw symptomau," meddai.

Bydd y gallu i bawb gael profion llif unffordd am ddim yn dod i ben fis Mehefin yng Nghymru.