Caerdydd: Cyhuddo menyw ar ôl i ddyn gael ei drywanu

Galwyd yr heddlu a'r ambiwlans i Ffordd Plymouth Wood yn ystod oriau mân fore Sul

Mae menyw wedi ymddangos yn y llys ar ôl i ddyn gael ei drywanu yng Nghaerdydd.

Galwyd yr heddlu toc cyn 05:00 fore Sul i'r digwyddiad mewn eiddo ar Ffordd Plymouth Wood yn ardal Trelái o'r brifddinas.

Cafodd dyn 32 oed ei gludo i Ysbyty Athrofaol Cymru, ac mae'n parhau i fod yno mewn cyflwr sefydlog.

Aeth Samantha Harries, 29, gerbron Llys Ynadon Caerdydd ddydd Mawrth wedi'i chyhuddo o fwriad i wneud niwed corfforol difrifol.

Bydd hi'n ymddangos yn Llys y Goron y brifddinas ar 19 Ebrill.