Pennal: 'Corwynt' yn achosi 'o leiaf £100,000' o ddifrod

Dywed un o drigolion Pennal ger Machynlleth bod corwynt wedi achosi difrod sylweddol i'w heiddo a'i gadael mewn dagrau.

Mae Deilwen Breese yn berchen ar fusnes lletygarwch a dywedodd nad yw wedi gweld gwynt yn gadael dinistr tebyg i'r hyn a gafwyd brynhawn Mercher

"Diolch i'r Iôr, mae pawb yn saff ac wedi goroesi'r hunllef 'ma," meddai ar raglen Dros Frecwast.

Doedd Mrs Breese ddim adref ar y pryd ond dywed bod ymwelwyr yn un o fythynnod y Gogarth "wedi gweld y gwynt yn troi wrth ddod fyny'r ffeld ac yn mynd â phopeth o'i flaen".

Mae difrod sylweddol i eiddo Deilwen Breese ym Mhennal yn sgil 'corwynt' ddydd Mercher

Difrod i'r coed gerllaw yn sgil y gwyntoedd cryfion

"O'dd hi'n ofnadwy. 'Da ni erioed wedi gweld y ffasiwn beth. Roedd y cyfan yn drychinebus ac mae wedi achosi difrod anhygoel - ond mewn llai na dwy funud roedd o drosodd," meddai.

"Mae yna ddifrod dychrynllyd - 'dan ni'n amcanu bod dros £100,000 o waith ar y toeon yn unig - mae pob coeden o gwmpas y tŷ wedi mynd."

Dywedodd Deilwen Breese fod "pawb dan deimlad yma heddiw" wedi'r llanastr

Roedd yna ddifrod i'r siediau ac fe gafodd ŵyn bach eu codi i'r awyr hyd yn oed, medd Mrs Breese

Ychwanegodd: "Pan ddos i nôl roedd y ffordd at y tŷ ar gau a do'n i ddim yn gallu dod fyny am oriau - roedd cymaint o goed ar y ffordd hefyd.

"Mae pob coeden wedi'i chael hi - fe 'sech chi wedi codi matsis i fyny ac wedi taflu nhw bob siâp bob tu.

"Roedd y gwynt hyd yn oed wedi codi ŵyn bach yn y siediau.

"O'dd 'na gutter yma ynghanol y ffordd wedi cael ei chodi ac wedi cael ei lluchio ar draws y ffordd fawr - lawr i un o'n caeau ni ac mae'r bois 'di bod yn gweld - allan nhw ddim hyd yn oed ei symud hi. Un cast iron ydy hi - ond meddyliwch y cryfder.

Y llonyddwch ar ôl y storm: Cafodd nifer o goed cyfagos eu dinistrio yn y gwynt mawr

"Dim ond fan hyn sydd wedi cael ei effeithio - allen ni ddim credu'r peth ond 'da ni mor ddiolchgar i ffrindiau a phobl leol ddaeth o fewn teirawr i roi cover dros y toeon.

"'Da ni'n gallu aros yn y cartref oherwydd bod pobl wedi dod â'r scaffolding ddoe. Weles i ddim byd mwy anhygoel - allwch chi ddim talu nôl am gymwynas fel hyn na allwch?"

• Rhybudd am wyntoedd o hyd at 70mya nos Fercher

'Pethau fel hyn yn digwydd ar ffilm'

Dywed ei fod wedi ffonio'r ymwelwyr sydd i fod i gyrraedd yno yn fuan a bod y gwesteion yn parhau i ddod i aros.

"Mae'n galonogol bod yr ymwelwyr am ddod," meddai gan ategu ei bod yn ddiogel iddyn nhw ddod.

"Heddiw mae'r gŵr a fi mewn sioc - mae yna ddagra' yma heddiw. Mi 'dach chi'n gweld rhywbeth fel hynna ar ffilm - dydy pethau fel hyn ddim yn digwydd yng Nghymru fech.

"Mae'r coed wedi mynd - mae'r lle ro'n i'n ei alw yng Nghoedlan y Plas wedi mynd - mae'n anhygoel."

"Mae pawb dan deimlad yma heddiw a dweud y gwir," ychwanegodd wrth Cymru Fyw.