Iaith y nefoedd: Y Pab yn annog defnydd o'r Gymraeg
- Cyhoeddwyd
Y Pab Francis
Mae'r iaith Gymraeg wedi derbyn sêl bendith gan un o ffigyrau enwoca'r byd mewn gwasanaeth arbennig gan yr Eglwys Gatholig yn Llundain.
Cafodd y gwasanaeth Offeren Mewn Diolchgarwch ei chynnal i Gatholigion Cymreig Llundain yn Eglwys St James, Spanish Place, ar Ddydd Mercher, 30 Mawrth.
Tuag at ddiwedd y gwasanaeth cafodd neges arbennig ei ddarllen gan yr Archesgob Gugerotti yn enw'r Pab Francis. Mae Archesgob Gugerotti yn gweithio fel Nuncio, sydd yn debyg i ddiplomydd neu lefarydd ar ran yr Eglwys Gatholig.
Dywedodd Archesgob Gugerotti fod y Pab "yn hapus iawn i ddeall bod gwasanaeth Cymraeg yn cael ei chynnal."
'Annog defnyddio'r Gymraeg'
Aeth ymlaen i ddweud er ei fod wedi astudio ieithoedd, roedd y Pab wedi ffeindio'r Gymraeg yn anodd yn y gorffennol, ond ei fod yn hoff o'r gair 'popty-ping' am ei fod yn air modern, ac mae'r Pab yn credu fod hi'n bwysig i hen ieithoedd aros yn gyfoes.
Dywedodd Archesgob Gugerotti fod y Pab yn "ymwybodol o dreftadaeth ddiwylliannol a hanesyddol Cymru, ac o gysylltiadau hynafol Cymru â Christnogaeth gyda Seintiau fel Beuno, Gwenffrewi a Cadog.
"Mae'r Pab hefyd eisiau annog Cymry a phobl sydd am weld y dreftadaeth yma'n parhau i ddefnyddio'r Gymraeg, i'w hastudio, siarad a gweddïo drwy gyfrwng yr iaith hynafol."
Archesgob Claudio Gugerotti gyda'r Pab Francis
"Mae'r Tad Sanctaidd yn gyrru ei bresenoldeb ysbrydol ac mae ei gofion cynhesaf yn ei weddïau at bawb sy'n cymryd rhan yn y digwyddiad Eglwysig pwysig yma.
"Fel addewid o'r nefol ras, mae'r Tad Sanctaidd yn galw gweddi'r Forwyn Fair Fendigaid a Dewi Sant, Nawddsant Cymru, ac yn rhannu'n gynnes, ei Fendith Apostolaidd."
Yr Offeiriad Gildas Parry O'Praem roddodd yr offeren mewn diolchgarwch o gyfraniad Cymru i'r Eglwys, ac roedd yna bedwar côr yno'n canu, ynghyd â Seindorf Y Gwarchodlu Cymreig.
Dywedodd y Tad Gildas wrth BBC Cymru Fyw: "Roedd hi'n anrhydedd mawr cael dathlu Offeren arbennig yn y Gymraeg yn eglwys St James's Spanish Place, Marylebone, ar 30ain o Fawrth. 'Roedd yn achlysur i'r gymuned Gatholig Gymraeg yn Llundain, ynghyd â'n brodyr a chwiorydd o eglwysi eraill, mynegi diolch i Dduw am gyfraniad ein diwylliant fel Cymry i fywyd a chenhadaeth yr Eglwys fyd-eang ar hyd y canrifoedd.
"Pleser o'r mwyaf oedd cael croesawu i'n plith nifer o westeion o fri, gan gynnwys y Nuncio Apostolaidd, hynny yw Llysgennad y Pab yma ym Mhrydain, yr Archesgob Claudio Gugerotti. Traddododd neges bwysig iawn i ni gan y Pab Ffransis, lle bu'n ein hannog i ddefnyddio ein hiaith a'n hetifeddiaeth Cymreig yn ein bywydau ysbrydol a litwrgaidd, ac hefyd wrth bregethu'r Efengyl i'n cydwladwyr.
"Hefyd, yn bwysig iawn, rhoddodd y Pab ei gefnogaeth i'r rhai sy'n hyrwyddo'r Offeren Gymraeg a'r litwrgi yn yr iaith Gymraeg. 'Roedd neges Pab Ffrancis yn un hynod o gefnogol, a dwi'n siŵr bydd Catholigion Cymraeg eu hiaith yn arbennig o ddiolchgar o'i chlywed."
Ymweliad 1982
Mae'r Pab wedi ymweld â Chymru yn y gorffennol wrth gwrs, ond y Pab John Paul II oedd hwnnw, 40 mlynedd yn ôl.
Pab John Paul II yn cyrraedd Maes Awyr Caerdydd yn 1982
Ar 2 Mehefin 1982 fe gyrhaeddodd y Pab Gaerdydd, ac fe dderbyniodd anrhydedd Rhyddid y Ddinas.
Teithiodd John Paul II i Gaeau Pontcanna gan gynnal gwasanaeth o flaen cynulleidfa o 100,000 o bobl.
Fe roedd rhan o'r anerchiad yn Gymraeg, gyda'r Pab yn dweud "Bendith Duw arnoch", gyda'r dorf yn cymeradwyo.
Wedi hynny fe aeth y Pab ymlaen i Barc Ninian, cartref Clwb Pêl-droed Dinas Caerdydd ar y pryd. Yno roedd 'na 33,000 o bobl ifanc, gyda gwasanaeth yn galw am heddwch (roedd hyn yn ystod Rhyfel y Falklands).
Pab John Paul II yn cusanu'r llawr wedi iddo gyrraedd Cymru
Hefyd o ddiddordeb: