Ffoadur o Syria i ailhyfforddi fel athrawes yng Nghymru

Mae Inas (dde) yn gobeithio bod yn ddylanwad da ar ei phlant Azza, 13, ac Abd Alrazak, 8

Mae ffoadur o Syria a ddaeth i Gymru ddwy flynedd yn ôl yn gobeithio ailddechrau ar ei gyrfa fel athrawes yn ei chartref newydd.

Mae Inas Alali, sy'n byw yng Nghaerdydd, yn gobeithio bod yn esiampl dda i'w phlant a "menywod eraill sy'n rhoi stop ar eu bywydau wrth newid eu gwlad".

Fe gafodd fenthyciad sy'n galluogi ffoaduriaid sydd â chymwysterau proffesiynol i ailhyfforddi, gyda help Cymdeithas Syriaid Cymru.

"Hoffwn i barhau â fy mywyd," meddai Ms Alali, 39.

Yn Syria, roedd hi'n dysgu Mathemateg a Saesneg i blant am 16 o flynyddoedd.

• Ffoaduriaid 'yn cael pob cyfle i ddysgu Cymraeg'

• Ffoaduriaid yn diolch am groeso Aberteifi

Roedd Ms Alali yn byw gyda'i gŵr, Wardan Alkoko a'u dau o blant Azza, 13, ac Abd Alrazak, 8, yn ninas Hama yng ngorllewin y wlad.

Ond bu farw ei gŵr yn 42 oed ar ôl cael canser, a hynny tra'r oedd rhyfel yn eu gwlad.

Bu farw gŵr Inas Alali, Wardan Alkoko pan oedd yn 42 oed

"Roedd e mor falch ohonof i a dwi'n gweld ei eisiau'n fawr," dywedodd Ms Alali.

Mae disgwyl iddi ddechrau ar ei chwrs hyfforddi yn yr hydref ac mae hi'n gobeithio dysgu Mathemateg i blant yng Nghymru yn y pendraw.

Cafodd fenthyciad gwerth £7,000 gan RefuAid, trwy broses ddethol oedd yn cynnwys llenwi ffurflenni a mynychu cyfweliadau.

Bydd yr arian yn talu am ddwy flynedd o hyfforddiant iddi.

'Eisiau cyfrannu at gymdeithas'

Dywedodd is-gadeirydd Cymdeithas Syriaid Cymru, Dr Hussein Halabi fod meddygon, cyfreithwyr ac athrawon a ddaeth i'r DU fel ffoaduriaid eisiau "dychwelyd i'r swyddi roedden nhw'n arfer eu gwneud".

"Maen nhw eisiau talu, cyfrannu at gymdeithas, y gymdeithas Gymreig, y gymdeithas Brydeinig ehangach," meddai.

"Maen nhw angen rhyw fath o gefnogaeth i ailgymhwyso... dyna pam mae'r benthyciad yn bwysig."

Roedd Inas yn dysgu Saesneg a Mathemateg cyn iddi orfod dod i Gymru fel ffoadur

Dywedodd Ms Alali: "Byddwn i'n hoffi parhau â fy mywyd. Byddwn i'n hoffi bod yn esiampl, yn gyntaf i fy mhlant, i fod yn berson da yn y wlad hon.

"Fel ffoadur dwi'n meddwl eich bod yn gallu cael pasbort Prydeinig mewn chwe blynedd, ond dwi'n meddwl bod angen i chi haeddu cael y pasbort Prydeinig hynny."