Heddlu'n trin marwolaeth dynes ym Môn fel un 'amheus'
- Cyhoeddwyd
Cafodd swyddogion eu galw i eiddo ym Maes Gwelfor, Rhyd-wyn, ddydd Gwener
Mae Heddlu Gogledd Cymru'n cynnal ymchwiliad wedi i ddynes gael ei darganfod wedi marw mewn eiddo ar Ynys Môn.
Cafodd swyddogion eu galw i'r eiddo ym Maes Gwelfor ym mhentref gogleddol Rhyd-wyn "yn gynharach" ddydd Gwener.
Dywedodd llefarydd ar ran y llu eu bod yn trin y farwolaeth "fel un amheus ac mae un person yn y ddalfa ar hyn o bryd mewn cysylltiad â'r digwyddiad".
Pwysleisiodd y llefarydd bod yr ymchwiliad ond newydd gychwyn a bod swyddogion yn "archwilio pob trywydd ar hyn o bryd".
Mae'r llu'n apelio i'r cyhoedd am wybodaeth.