Cyhoeddi carfan Cymru ar gyfer gemau tyngedfennol

Does ond angen i Gymru ennill un gêm er mwyn cyrraedd Cwpan y Byd am y tro cyntaf ers 1958

Mae Robert Page wedi cyhoeddi carfan Cymru ar gyfer y gêm ail gyfle i gyrraedd Cwpan y Byd.

Bydd Cymru yn wynebu un ai'r Alban neu Wcráin ar 5 Mehefin i sicrhau lle yn Qatar, a bydd pedair gêm yng Nghynghrair y Cenhedloedd yn ystod y mis.

Mae'r hoelion wyth wedi cadw eu lle yn y garfan o 27, ond yn cael ei gynnwys am y tro cyntaf mae Nathan Broadhead o glwb Everton.

Wedi treulio'r tymor ar fenthyg gyda Sunderland, mae'r ymosodwr 24 oed o Fangor wedi sgorio 13 gôl mewn 26 ymddangosiad yn Adran Un.

Mae Nathan Broadhead wedi serennu i Sunderland

Yn dod yn ôl i'r garfan yn dilyn anaf mae'r golwr Danny Ward a Kieffer Moore, a symudodd i Bournemouth fis Ionawr.

Mae Gareth Bale hefyd yn cael ei gynnwys er y diffyg gemau i Real Madrid, yn ogystal ag Aaron Ramsey.

Tra bydd y rhan fwyaf o'r sylw yn canolbwyntio ar y gêm fawr ar 5 Mehefin yng Nghaerdydd - gyda Chymru'n gobeithio cyrraedd Cwpan y Byd am y tro cyntaf ers 1958 - hon hefyd fydd ymgyrch gyntaf Cymru yn haen A Cynghrair y Cenhedloedd.

O ganlyniad bydd sawl gêm yn cael ei chwarae dros gyfnod o bythefnos, gan gynnwys yn erbyn rhai o dimau cryfaf y cyfandir.

Gemau Mehefin

• 1 Mehefin, 17:00 - Gwlad Pwyl v Cymru (Cynghrair y Cenhedloedd)

• 5 Mehefin, 17:00 - Cymru v Yr Alban neu Wcráin (Cwpan y Byd)

• 8 Mehefin, 19:45 - Cymru v Iseldiroedd (Cynghrair y Cenhedloedd)

• 11 Mehefin, 19:45 - Cymru v Gwlad Belg (Cynghrair y Cenhedloedd)

• 14 Mehefin, 19:45 - Iseldiroedd v Cymru (Cynghrair y Cenhedloedd)

Y garfan yn llawn

Hennessey, Ward, A Davies

B Davies, Rodon, Mepham, Gunter, Norrington-Davies, Roberts, N Williams

Allen, Morrell, Ampadu, Smith, Ramsey, Levitt, Matondo,Thomas, Colwill, Wilson, J Williams

Bale, James, Harris, Broadhead, Moore, Johnson